By Staff Contributor
Sa usapin ng West Philippine Sea, ang pagtatanggol sa bansa ay hindi lisensya para talikuran ang disiplina, lalo na kapag ang nagsasalita ay nakasuot ng uniporme ng Republika.
Malaya ang isang ordinaryong mamamayan na magpahayag ng pananaw sa vlog, social media, o anumang plataporma. Saklaw ito ng sibilyang pananalita.
Ngunit iba ang usapan kapag may uniporme na. Nagbabago ang mga patakaran at may kaakibat na pananagutan dahil hindi lang personal na opinyon ang kinakatawan ng mga may mahalagang posisyon, kundi ang institusyon at mismong ang bandila.
Ito ang dapat pagnilayan ni Philippine Coast Guard Spokesperson Commodore Jay Tarriela at ng mga opisyal na nagtatanggol sa karikaturang nangutya sa Pangulo ng Tsina: anuman ang inis o pagkadismaya, wala sila sa posisyong magsalita na nakasuot ang uniporme na para bang ito ay opisyal na pahayag ng estado. Lalo na, mga estudyante pa pala ang kausap.
Sa ganitong konteksto, malinaw na kailangan ng disiplina ng mga tagapagsalita—hindi upang busalan ang diskurso, kundi upang mapanatili ang kredibilidad ng mga institusyong kanilang nirerepresenta.
Sabi nga ng isang paalala: “Patriotism without discipline weakens the very cause it seeks to defend.” Mahalagang isipin ito lalo na kapag teritoryo at pambansang interes ang pinag-uusapan. ###